वीरगञ्ज । बाराको जितपुर सिमरा उपमहानगरपालिका–२ सिमरास्थित जगदम्बा स्टिल प्रा.लि.को फलाम गलाउने भट्टी पड्किँदा ४ जना कर्मचारी घाइते भएका छन् ।
घाइतेमध्ये १ जनाको अवस्था गम्भिर छ । चार जनामध्ये सर्लाहीको सक्रौल गाउँपालिका–६ बस्ने ४० वर्षीय बिकिन्द्र यादव गम्भिर घाइते भएको प्रहरीले जनाएको छ ।
यादवको नेशनल मेडिकल कलेजमा उपचार भइरहेको छ । दुर्घटनामा भारत मोतिहारी जिल्ला बस्ने अन्दाजी २६ वर्षीय नईमुदिन आलम, भारत शिवन ग्राम जिल्ला बस्ने ४८ वर्षीय जनक देव यादव र सर्लाही बरथवा नगरपालिका–५ बस्ने २८ वर्षीय मुकेश साह घाइते छन् ।
आलम र यादवको तराई अस्पताल सिमरामा र वीरगञ्ज हेल्थ केयर अस्पतालमा उपचार भइरहेको जिल्ला प्रहरी कार्यालय बाराले जनाएको छ ।
शनिबार बिहान पौने १ बजे फलाम गलाउने भट्टी अचानक पड्किँदा भट्टीमा काम गरिरहेका उनीहरु घाइते भएका हुन् ।
आफूलाई देशकै उत्कृष्ट स्टिल कम्पनी दावी गर्ने जगदम्बा स्टिलले फलाम गलाउने भट्टी नै अव्यवस्थित बनाउँदा आज दुर्घटना हुन पुगेको एक स्थानीयबासीले बताए ।
फलाम गलाउने भट्टी अन्तर्राष्ट्रिय मापदण्ड पूरा गरेको हुनु पर्नेमा कम्पनीले हेलचेक्य्राई गर्दा घटना हुन पुगेको उनको भनाई छ ।
स्रोतका अनुसार प्रहरीको प्रारम्भिक अनुसन्धानबाट उद्योगको फलाम गालाउने भट्टी पुरानो भएर उच्च तापक्रमको कारण विस्फोट भएको खुलेको छ।
Leave a Reply