काठमाडाैं । सरकारले कोरोना संक्रमित नेपाली कांग्रेस सांसद मीनबहादुर विश्वकर्माको उपचार खर्च बेहोर्ने निर्णय गरेकाे छ ।

बुधबार बसेकाे मन्त्रिपरिषद् बैठकले विश्वकर्माको उपचारकाे सम्पूर्ण खर्च सरकारले बेहोर्ने निर्णय गरेको एक मन्त्रीले जानकारी दिए ।

श्वासप्रश्‍वासमा समस्या देखिएपछि वीर अस्पताल भर्ना भएका सांसद विश्वकर्माको अहिले ग्रान्डी अस्पतालमा उपचार भइरहेको छ ।

कात्तिक ८ गते वीर अस्पताल भर्ना भएका उनमा कोरोना संक्रमण देखिएको थियो । त्यसपछि उनलाई कात्तिक १२ गते ग्रान्डी अस्पताल भर्ना गरेर भेन्टिलेटरमा राखिएको थियाे ।

विश्वकर्मालाई थप उपचारका लागि विदेश लैजान प्रमुख प्रतिपक्षी कांग्रेसले आग्रह गरेको थियो । तर, कोरोना संक्रमित भएको र भेन्टिलेटरमा राखेर उपचार गराइरहेको भन्दै नेपालमा नै उपचार भइरहेको हो । उनलाई ६ दिन भेन्टिलेटरमा राखेर उपचार गरिएको थियो । पछिल्लो समय उनको स्वास्थ्यमा सुधार भइरहेको छ ।