रामेछाप । रामेछापकाे मन्थली नगरपालिका कार्तिक २ गते सम्मका लागि शिल गरिएको छ ।

नगरपालिकाका कर्मचारी सहित २० जना कोरोना भाइरसकाे संक्रमण पुष्टि भएपछि नगरपालिकाको कार्यालय कार्तिक २ गते सम्मका लागि बन्द गरिएको नगर प्रमुख रमेशकुमार बस्नेतले जानकारी दिए ।

साथै उनका अनुसार नगरपालिकाका केही कर्मचारीमा कोरोना पुष्टि भएकाले विपद् र फोहोरमैला बाहेकका सबै सेवा बन्द गरिएको छ ।

स्वास्थ्य कार्यालय रामेछापका अनुसार मंगलबार मन्थली नगरपालिका, नेपाल विद्युत प्राधिकरण, राष्ट्रिय वाणिज्य बैंक मन्थली शाखा, विद्यालयका कर्मचारी र केही व्यवसायी गरी २० जनालाई कोरोना संक्रमण पुष्टि भएको थियो ।

नगरपालिकाले संक्रमित सबैलाई होम आइसोलेसनमा राख्ने व्यवस्था मिलाएको जनाएको छ ।