एजेन्सी। बलिउड अभिनेता सुशान्तसिंह राजपुतको आत्महत्या केसमा जोडिएकी  प्रेमिका रिया चक्रवर्तीलाई बम्बै उच्च अदालतले जमानतमा रिहा गर्न आदेश दिएको छ ।

लागूऔषध मुद्दाको अनुसन्धानका लागि झन्डै एक महिनादेखि न्यायिक हिरासतमा रहेकी रियालाई बुधबार बम्बै उच्च अदालतले जमानतमा रिहा गर्न आदेश दिएको हो ।

रियासँगै दिपेश सावन्त र स्यामुएल मिरान्डलाई पनि जमानतमा रिहा गर्न अदालतले आदेश दिएको भारतीय सञ्चार माध्यले जनाएका छन् ।

रियाका भाइ शोविक चक्रवर्तीको जमानत याचिका भने अदालतले खारेज गरिदिएको छ । रियाले प्रहरीलाई पासपोर्ट बुझाउनुपर्नेछ भने मुम्बईबाट बाहिर जानुपरेमा अनुमति लिनुपर्नेछ । सोधपुछका लागि बोलाउँदा पनि उनी उपस्थित हुनुपर्ने सर्तमा उनलाई रिहा गर्न बम्बै उच्च अदालतले आदेश दिएको हो ।

एनसीबीले ९ सेप्टेम्बरमा २८ वर्षीय रियालाई सुशान्त मृत्यु प्रकरणसँग जोडिएको लागूऔषध मुद्दामा  पक्राउ गरेको थियो।  सुशान्तलाई लागूऔषध उपलब्ध गराएको रियामाथि आरोप लागेको थियो ।