दाङ । तुलसीपुर उपमहानगरपालिका बस्ने डण्डविर खड्कालाई खुकुरी प्रहार गरेको आरोपमा प्रहरीले तीन जनालाई पक्राउ गरेको छ ।

सल्यान बागचौघर घर भइ हाल उपमहानगरपालिका-६ भीआईपी टोल बस्ने १९ बर्षीय खड्कालाई खुकुरी प्रहार गरेको आरोपमा तुलसीपुर उपमहानगरपालिका–६ भीआईपी टोल निवासी १९ बर्षीय शिवप्रसाद चौधरी, सोही ठाउँ निवासी १६ बर्षीय दिपेश चौधरी र सोही ठाउँ निवासी १७ बर्षीय संदिप सुनारलाई पक्राउ गरिएकाे एसपी गणेश चन्दले जानकारी दिए ।

तुलसीपुर–६ मा रहेको विजय फर्निचरमा काम गरि फर्कने क्रममा आइतबार साँझ खड्कालाई एक्कासी अज्ञात व्यक्तिहरुले धारिलो हतियार प्रहार गरी गम्भीर घाइते बनाएको एसपी चन्दले बताए ।

घटनापछि इलाका प्रहरी कार्यालय तुलसीपुरका प्रहरी नायब उपरीक्षक (डीएसपी) शिवबहादुर सिंहको कमाण्डमा खटिएको टोलीले तुलसलीपुर उपमहानगरपालिका–६ भीआईपी टोलमा लुकीछिपी बसेको अवस्थामा उनीहरुलाई पक्राउ गरेको हो ।

पक्राउ परेका अभियुक्तहरुको साथबाट प्रहरीले घटनामा प्रयोग भएको १ थान खुकुरीसहित बरामद गरेको छ । जिल्ला अदालत दाङबाट म्याद थप गरी आवश्यक अनुसन्धान भइरहेको प्रहरीले जनाएको छ ।