काठमाडौं । ऊर्जा, जलस्रोत तथा सिंचाइ मन्त्रालयले नेपाल विद्युत प्राधिकरणको कार्यकारी निर्देशकमा फेरी कुलमान घिसिङलाई नै नियुक्त गर्ने तयारी गरेकाे छ ।

ऊर्जा मन्त्रालयले शुक्रबार घिसिङलाई नै दोस्रो कार्यकालका लागि नियुक्ति गर्नेगरी प्रस्ताव तयार पारेको स्राेतले जानकारी दियाे । अब आइतबार बस्ने मन्त्रिपरिषद् बैठकले ऊर्जामन्त्रालयकाे प्रस्तावमा प्राधिकरणको कार्यकारी निर्देशकमा फेरी कुलमान घिसिङलाई नै नियुक्त गर्नेछ ।

स्रोतका अनुसार कुलमानलाई फेरि नियुक्ति गर्ने पक्षमा नरहेका प्रधानमन्त्री केपी ओली समेत अहिले राजी भइसकेका छन् । नेपाल कम्युनिस्ट पार्टी (नेकपा) कार्यकारी अध्यक्ष पुष्पकमल दाहाल प्रचण्डसँग भएको छलफलपछि उनी कुलमानलाई नै नियुक्र गर्न राजी भएका हुन् ।

प्राधिकरणका कार्यकारी निर्देशक घिसिङको ४ वर्षे कार्यकाल आइतबार सकिँदै छ । लोडसेडिङबाट आक्रान्त जनतालाई लोडसेडिङ अन्त्य गराएर उज्यालो दिएका घिसिङको पक्षमा अहिले आम जनता उभिएका छन् ।