काठमाडौं। नेपाल प्रहरीका आईजीपी शैलेश थापा क्षेत्रीको मौनतापछि दुई बर्षअघि फेल भएको नेपाल प्रहरीको ऊलन पाइन्टको कपडा लिन लागिएको छ।

ठेकेदार पिताम्वर मुन्काले प्रहरी मुख्यालयको प्रवन्ध निर्देशनालयका प्रमुख एसएसपी पुरुशोत्तम कँडेल र एसपी प्रेम बस्नेतसँग मिलेमतो गरी  उक्त फेल भएको कपडा लिन लागिएपछि आईजीपी  क्षेत्रीको सुशासन कायम गर्ने अभियान नारामा मात्र सीमित हुन लागेको हो। ।

गुणस्तरमा नमूना टेष्ट गर्दा कपडा फेल भएपछि प्रहरीले नलिएको भन्दै ठेकेदार मुन्काले उच्च अदालतमा मुद्दा दायर गरेका थिए ।

सर्वेन्द्र खनाल आइजीपी हुँदा मुन्काले अदालतबाट मुद्दा जिते पनि कपडा गुणस्तर नभएको भन्दै प्रहरीले कपडा लिएको थिएन । ठाकुर ज्ञवाली आइजीपी हुँदा पनि मुन्काले कपडा लिनको लागि धेरै दवाव दिएका थिए तर लिएनन् ।

अदालतले जिताए पनि गुणस्तर फेल भएको कपडा कसरी लिने भनेर दुई आइजीपीले लिएनन् तर झन् इमानदार र नेपाल प्रहरीलाई सिष्टममा हिंडाउन पर्यत्न गर्ने आईजीपी शैलेश थापाको समयमा फेल भएको कपडा लिने तयारी भइरहेको स्रोत बताउँछ । कपडा लिनका लागि एसएसपी कँडेल र एसपी बस्नेतले निकै सक्रियता देखाएका छन् । फेल भएको सो कपडा पुनः टेष्टका लागि दक्षिण भारतको चेन्न्याई पठाइएको छ ।

यो प्रकरणमा ठूलो आर्थिक चलखेल भएको समाचार सूत्र बताउँछ । आर्थिक प्रशासनका प्रमुख र प्रबन्धको समेत जिम्मा पाएका एसएसपी कँडेलले उच्च अदालतबाट मुद्दा हारे पनि सर्वोच्चमा गुणस्तरहीन कपडा खरिद गर्न नसकिने भन्दै पुनरावेदनमा जानुपर्नेमा मुन्काको प्रभावमा परी त्यो कपडा लिएर भुक्तानी गर्न खोजेको आरोप छ ।

प्रहरीमा गतबर्ष फेल भएको झुल, ऊलन पाइन्ट खरिद गर्ने र  मुन्काको ऊलन पाइन्टको कपडा पनि अदालतको आदेश भनी लिन खोज्ने कँडेललाई आइजीपी थापाले प्रबन्धको समेत जिम्मा दिएका छन् ।

गुणस्तरमा धेरै नै गुनासो आउने र ठेकेदारले सेटिङ गर्ने गरेको पाइएपछि उपेन्द्रकान्त अर्यालको पालामा भारतको एसजीएस र आइटिएसमा परीक्षण गराउनुपर्ने नियम बनाइयो । लत्ताकपडा गुणस्तरीय हुन् भनेर प्रतिष्ठित एसजीएस र आईटीएसमा प्रहरीले पठाउन थाल्यो । तर ठेकेदारहरूले एसजीएसमा समेत सेटिङ गरेर गुणस्तरहीन लत्ताकपडा र जुत्ताहरूको नमुना परीक्षण गराउन थाले ।

यो गुनासो आएपछि आईजीपी थापाले टेण्डर बिड गर्दा ठेकेदारले पेश गरेको नमुना आईटीएसमा पठाएमा सामान बुझाएपछिको नमूना आईटीएसमा नपठाउने क्रम थालिसकेका छन् । तर, आईजीपी थापालाई प्रबन्धका निमित्त प्रमुख एसएसपी पुरुषोत्तम कँडेल र एसपी प्रेम बस्नेतले गुमराहमा पारी गुणस्तरहीन भनेर प्रहरीले अस्वीकृत गरेका सामानसमेत खरिद गरी भुक्तानी दिएको समाचार छ ।

गत वर्ष नै प्रहरीले गुणस्तर फेल भनेर अस्वीकृत गरेको राजन कडरियाको १७ हजार थान झुल (मस्क्वीटो नेट) यो वर्ष राजु थापाको विवांश ब्याग कम्पनीले प्रहरीमा बुझाएर भुक्तानी लिइसकेको छ । गत वर्ष फेल भएको झुल यो वर्ष प्रहरीले लियो भन्ने प्रश्न उठेको छ । यी दुवै गत वर्ष फेल भएका सामान खरिद गरी नमुना पास गराउने क्रममा गोलमाल भएको स्रोत बताउँछ ।(साँघु साप्ताहिकबाट )