काठमाडौं । महाराजगञ्जस्थित टिचिङ अस्पतालमा मृत्यु भएका उदयपुरको त्रियुगा नगरपलिका–४ का ५२ वर्षीय शिक्षकमा कोरोना पुष्टि भएको छ ।

उनलाई निमोनियाको आशंकामा गत मंगलबार राति ११ बजे शिक्षण अस्पतालमा पुर्‍याइएलगत्तै चिकित्सकले मृत घोषित गरेका थिए ।

ज्वरो आउने र श्वासप्रश्वासमा समस्या देखिएका उनी साउन २८ देखि बिरामी रहेको बताइएको छ । भदौ २ गते जिल्ला अस्पताल बोक्सेमा पुगेका उनी सामान्य उपचारपछि घर फर्किएका थिए ।

तर, त्यहाँ ठिक नभएपछि भदौ ६ गते उनले त्रियुगा नगरपालिका–३ स्थित राजेश हेल्थकेयर सेन्टर प्रालिमा भर्ना भएका थिए ।

त्यहाँ पनि ठिक नभएपछि उनलाई ९ गते उनलाई त्रियुगाबाट टिचिङ अस्पताल ल्याइएको थियो । सोही दिन स्वाब झिकेर उपचार थालिएकोमा बिहीबार राति उनको कोरोना रिपोर्ट पोजेटिभ आएको हो ।