काठमाडौं । पछिल्लाे केही दिनदेखि कोरोना संक्रमितको संख्या बढ्दै गएपछि सरकारले बुधबारराति १२ बजेदेखि काठमाडौं उपत्यकामा निषेधाज्ञा जारी गरेको छ । निषेधाज्ञा कार्यान्वयन गराउन ब्यापक मात्रमा सुरक्षाकर्मीहरुलाई सडकका चोक तथा गल्लीहरुमा परिचालन गरिएको छ ।

उपत्यकाका तीनवटै जिल्ला प्रशासन कार्यालयले निषेधाज्ञाको पालना नगर्नेहरुलाई दण्डित गर्ने चेतावनी दिएका छन् । तर नयाँ बानेश्वर चोकको विहानको दृष्य भने फरक थियो । त्यहाँ प्रहरीहरुले निषेधाज्ञा उल्लंघन गर्नेहरुलाई केहीबेर होल्डिङ सेन्टरमा उभ्याएर छाडेका छन् ।

बानेश्वर चोकको सडक किनारमा होल्डिङ सेन्टर बनाइएको छ । जथाभाबी हिँडडुल गर्ने र पासविना सवारी साधन चलाउनेहरुलाई त्यहाँ व्यक्तिगत दुरी कायम राखी केहीबेर उभ्याउने र अबदेखि निषेधाज्ञा पालना गर्ने सर्तमा छाड्ने गरिएको हो ।