काठमाडाैं । कोरोना भाइरसका संक्रमितको संख्या बढ्न थालेपछि प्रदेश-५ का तीन जिल्लाले लकडाउन गरेका छन् । प्रदेश-५ का रूपन्देही, अर्घाखाँची र प्यूठानले आउँदै गरेको तिजमा हुनसक्ने सार्वजनिक कार्यक्रमका कारण थप जोखिम निम्तिन सक्ने ठहर गर्दै अत्यावश्यक बाहेकका सबै सेवा बन्द गर्ने निर्णय गरेका छन् ।

रुपन्देहीले मंगलबार राति १२ बजेदेखि भदौ ७ गते राति १२ बजेसम्मका लागि जिल्ला लकडाउन गरिएकाे जनाएकाे छ । यस्तै अर्घाखाँचीले भदौ ३ गते बिहान ६ बजेदेखि भदौ १० गतेसम्म लकडाउन गर्ने निर्णय गरेकाे छ । यता प्यूठानले मंगलवार राति १२ बजेदेखि लकडाउन गर्ने निर्णय भएको जिल्ला प्रशासन कार्यालयले जनाएकाे छ ।

जिल्लाभित्रका आन्तरिक यातायातलाई कडाई गरेपनि राजमार्गहरुमा चल्ने गाडीलाई भने नरोक्ने जिल्ला प्रशासन कार्यालयहरुले जनाएका छन् । प्रदेश ५ को तीब्र संक्रमण देखिएको कपिलवस्तुमा निषेधाज्ञा जारी छ भने बाँके, बर्दिया, दाङलगायतका जिल्लामा पनि कडाई गरिएको छ।