काठमाडौं । प्रहरीले सल्यानमा छिमेकी युवकको हत्या गरी फरार भएका व्यक्ति २२ वर्षपछि पक्राउ परेका छन् । २०५५ साल कात्तिक ५ गते दिउँसो २ बजे सल्यानको तत्कालीन निगालचुला गाबिस-२ का २३ वर्षीय मनबहादुर कामीको हत्या गरी फरार भएका ६६ वर्षीय ईन्द्रे कामीलाइ प्रहरीले पक्राउ गरेकाे हाे ।

सुर्खेतको गुर्भाकोट नगरपालिका-१ बाट आइतबार उनलाई पक्राउ गरिएको जिल्ला प्रहरी कार्यालय सल्यानका प्रवक्ता प्रहरी निरीक्षक उमाकान्त जोशीले जानकारी दिए । हत्यापछि फरार भएका कामी सुर्खेतमै घर बनाएर लुकिछिपी बसेकाे सूचनाका आधारमा सल्यानबाट खटिएको प्रहरी टोलीले पक्राउ गरेको जोशील बताए ।

सल्यान जिल्ला अदालतको कामीलाई २० वर्ष कैद फैसला सुनाएको थियो । सोही सजाय भुक्तानीका लागि उनलाई सोमबार अदालतले कारागार चलान गरिसकेको छ ।