काठमाडौं । ललितपुरको किस्ट अस्पतालमा उपचाररत ५० वर्षीय पुरुषकाे काेराेना संक्रमणबाट मृत्यु भएकाे छ । काभ्रे पाँचखालका एक पुरुष निमोनियाको उपचार गराउन आइतबार दिउँसो १ बजे अस्पताल पुगेका थिए ।

निमोनियाको उपचार गराउन आउँदा शंका लागेर उनको कोरोना परीक्षणका लागि नमुना संकलन गरिएको थियो । आईसीयूमा उपचाररत हुँदा सोमबार विहान उनको मृत्यु भएको अस्पतालका चिफ अपरेटिङ अफिसर अमिश पाठकले जानकारी दिए ।

मृतक पुरूषमा निमोनियका साथै छातीको पनि समस्या देखिएको थियो । उनको आज दिउँसो ४ बजे पछिमात्रै पीसीआर रिपोर्ट पोजेटिभ आएको थियो । नेपाली सेनाले उनको शव व्यवस्थापनको तयारी थालेको अस्पतालले जनाएको छ ।