काठमाडौं । उपत्यकामा दिनहुँ कोरोना भाइरस कोभिड-१९ को संक्रमितको सङ्ख्या बढेपछि कोभिड-१९ तोकिएका (डेडिकेटेड) अस्पतालमा चाप बढेको छ। शुक्रराज ट्रपिकल तथा सरुवा रोग अस्पताल, पाटन स्वास्थ्य विज्ञान प्रतिष्ठान र सशस्त्र प्रहरीको बलम्बुस्थित अस्पतालमा संक्रमितको भर्ना हुने सङ्ख्या बढिरहेको छ।

बिहीबार मात्र उपत्यकामा ८७ जनामा सङ्क्रमण देखिएको थियो। अहिलेसम्म उपत्यकामा करिब ७०० मा सङ्क्रमण देखिएको छ। अस्पतालमा क्षमताभन्दा बढी संक्रमित आउन थालेपछि बिरामी राख्ने शैय्याको समेत अभाव हुन थालेको छ। शुक्रराज ट्रपिकल तथा सरुवा रोग अस्पताल टेकुमा ५० शैय्यामध्ये ४९ श्ययामा बिरामी राखेर उपचार भइरहेको छ। यस्तै पाटन अस्पतालमा कोभिड-१९ का लागि छुट्ट्याइएका ६० शैय्या भरिएर थप १२ शैय्या पनि संक्रमितलाई राखेर उपचार गरिरहेको अस्पतालका निर्देशक डा विष्णुप्रसाद शर्माले जानकारी दिए। पाटनमा भर्ना गरिएका संक्रमित प्रायः लक्षण भएका छन्। तीमध्ये चार जनालाई भेन्टिलेटरमा राखी उपचार गरिरहेको उनले जानकारी दिए।

यसैगरी शुक्रराज ट्रपिकल तथा सरुवा रोग अस्पतालमा पनि शैय्या अभाव हुन थालेको छ। कूल ५० शैय्यामा एउटा मात्र खाली रहेको अस्पतालका निर्देशक डा सागर राजभण्डारीले जानकारी दिए। अस्पतालमा सघन उपचार कक्ष (आइसियु) २० वटामध्ये १५ वटामा संक्रमितको उपचार भइरहेको छ। यस्तै नौ भेन्टिलेटरमध्ये दुई भेन्टिलेटरमा गम्भीर अवस्थाका बिरामीको उपचार भइरहेको छ।

अस्पतालका निर्देशक डा राजभण्डारीले संक्रमित बढ्न थालेपछि अब लक्षण भएका संक्रमितलाई मात्र भर्ना गरेर उपचार गरिने बताउनुभयो। ‘उपत्यकामा संक्रमित दैनिक बढिरहेका छन्। ती सबै संक्रमितलाई अस्पतालमा भर्ना गरेर उपचार गर्न सम्भव छैनु, उनले भने ुअब लक्षण देखिएका बिरामीलाई मात्र भर्ना गरेर उपचार गर्ने हो।’ उनले लक्षण नभएका संक्रमितलाई घरमै आइसोलेसनमा बसेर उपचार गरिने बताउनुभयो। केही दिनयता रुघाखोकी, ज्वरो, स्वासप्रस्वासमा समस्या, थकाइ लाग्ने, स्वाद तथा गन्ध थाहा नपाउनेजस्ता लक्षण भएका संक्रमित देखिन थालेका छन्।

अस्पतालमा भर्ना भएका ३३ प्रतिशत संक्रमितमा लक्षण देखिएका छन्। यसैगरी वीर अस्पतालमा दुई जनाको आइसोलेसनमा राखेर उपचार भइरहेको छ। कोभिड-१९ अस्पताल नतोकिए पनि चार वटा आइसोलेसन शैय्याको व्यवस्था गरेको वीरका निर्देशक डा केदार सेञ्चुरीले जानकारी दिए।

उनले स्वास्थ्य तथा जनसङ्ख्या मन्त्रालयले कोभिड(१९ का संक्रमितलाई पनि उपचार गर्न परिपत्र गरेपछि आवश्यक व्यवस्था गर्न थालेको बताउनुभयो। उहाँका अनुसार वीरमा अहिले १५ संक्रमितलाई उपचार गर्ने व्यवस्था रहेको छ। ‘पहिले हामीलाई कोभिड-१९ का संक्रमितको उपचार गर्न भनिएको थिएन। त्यसैले हामीले संक्रमितका उपचारको व्यवस्था गर्नका लागि तयारी गरेका थिएनौँ, उनले भने ‘तर अहिले मन्त्रालयले नै निर्देशन दिएपछि हामी उपचारको व्यवस्था गर्न जुटेका छौं।

त्रिभुवन विश्वविद्यालय शिक्षण अस्पतालमा अहिले नौ जना संक्रमितको उपचार भइरहेको छ। तीमध्ये तीन जना आइसियु र छ जनालाई आइसोलेसनमा राखेर उपचार भइरहेको अस्पतालका कोभिड-१९ व्यवस्थापन समितिका संयोजक डा सन्तकुमार दासले जानकारी दिए।

उनका अनुसार अस्पतालमा १५ जनालाई मात्र उपचार गर्ने सक्ने व्यवस्था रहेको छ। ‘हाम्रो अस्पताल कोभिड-१९ का संक्रमितको उपचार गर्न भनेर तोकिएको अस्पताल होइनु, उनले भने ‘त्यसैले हामीले धेरै संक्रमित राख्ने सक्ने अवस्था छैन। मन्त्रालयले कोभिड-१९ का संक्रमितको उपचार गर्न निर्देशन दिए भने हामी तयारी गर्दछौँ।’ नेपालमा अहिलेसम्म २१ हजार ७५० जनामा सङ्क्रमण देखिएको छ। तीमध्ये १५ हजार ३८९ निको भएर घर फर्किसकेका छन्। यस्तै ६५ जनाको मृत्यु भइसकेको छ भने सक्रिय संक्रमित छ हजार २९६ छन्। रासस