काठमाडौं । फुटको संघारमा पुगेको सत्तारुढ दल नेपाल कम्युनिस्ट पार्टी (नेकपा) भित्र एकले अर्कोलाई दोषारोपण गर्ने काम शुरु भएको छ ।

अध्यक्षद्धय केपी शर्मा ओली र पुष्पकमल दाहाल ‘प्रचण्ड’बीच छलफल हुन नसकिरहेका बेला तल्लो तहका नेताहरु भने आरोप प्रत्यारोपमा लागेका छन् ।

पचण्ड पक्षले ओलीका कारण पार्टी फुटको संघारमा पुगिसकेको बताउन थालेका छन् भने ओली पक्षले जस्तो सुकै अवस्था आए पनि अध्यक्ष र प्रधानमन्त्रीबाट राजिनामा दिन नहुने भन्दै उक्साइरहेका छन् ।

त्यसो त पार्टीभित्र चुलिएको विवाद सामाजिक सञ्जालमा समेत देखिन थालेका छन् ।

प्रधामन्त्रीका सल्लाहकार विष्णु रिमालले पार्टीका प्रवक्ता नारायणकाजी श्रेष्ठलाई प्रवक्ता पदको लाज जोगाउन आग्रह गर्दै सामाजिक सञ्जाल ट्वीटरमा पोष्ट गरेपछि यो कुरा सतहमा आएको हो ।

रिमालले ‘इनफ इज इनफ’ लेख्दै प्रवक्ता श्रेष्ठलाई भनेका छन् ‘नारायणकाजी जी कम से कम पार्टी प्रवक्ता पदको लाज त जोगाउनुस् । बिधी र पद्दतीको नक्कली गीत गाउँदै नेताहरुलाई गुटवन्दीको आगोमा पोल्न उत्तोलक नबन्नुहोस् ! पार्टी एकताबिरुद्धका कुनै पनि गतिबिधी कतैबाट पनि नहोस ११ मुलुक संवेदनशील मोडमा छ महशुस होस !!!’