काठमाडौं । वीरगञ्जमा आज बिहान मृत्यु भएका ५६ वर्षीय पुरुषमा कोरोना भाइरस संक्रमण पुष्टि भएको छ । अस्थायी कोरोना विशेष अस्पतालमा मृत्यु भएका भएका वीरगञ्ज–१० आदर्शनगरका पुरुषमा कोरोना संक्रमण पुष्टि भएसँगै पर्सामा कोरोनाबाट मृत्यु हुनेको संख्या १५ पुगेको छ ।

मधुमेह र मुटुरोगी उनी श्वास प्रश्वासमा समस्या देखिएपछि उनलाई साउन २२ गते साँझ नारायणी अस्पताल अन्तर्गतको कोरोना विशेष अस्पताल गण्डकमा भर्ना गरिएको थियो । अवस्था गम्भीर बन्दै गएपछि गएराति १० बजेतिर भेन्टिलेटरमा राखेर उपचार सुरु गरिएको थियो ।

उपचारकै क्रममा बिहीबार बिहान उनको मृत्यु भएको र पीसीआर परीक्षण गर्दा रिपोर्ट पोजेटिभ आएको गण्डक कोभिड अस्पालका संयोजक डाक्टर उदय नारायण सिंहले जानकारी दिए ।