काठमाडौं । पछिल्लो २४ घण्टामा नेपालमा थप ३८१ जनामा कोरोना भाइरस संक्रमण पुष्टि भएको छ । बुधबारको नियमित प्रेस ब्रिफिङमा स्वास्थ्य मन्त्रालयका प्रवक्ता प्रा. डा. जागेश्वर गौतमले काठमाडौंमा ५७ र ललितपुर ५ सहित देशभर ३८१ जनामा कोरोना संक्रमण पुष्टि भएको जानकारी दिए ।

योसँगै नेपालमा कोरोना संक्रमितको संख्या २१ हजार ३९० पुगेको छ । यस्तै पछिल्लो २४ घण्टामा १३० जना संक्रमण मुक्त भएका छन् । बुधबारसम्म कोरोना संक्रमण मुक्त हुनेको संख्या १५ हजार १५६ पुगेको छ ।

अहिलेसम्म नेपालमा कोरोना संक्रमणबाट ६० जनाको मृत्यु भएको स्वास्थ्य मन्त्रालयले पुष्टि गरेको छ ।