वासिङ्टन — अमेरिकी राष्ट्रपति डोनाल्ड ट्रम्पले राष्ट्रव्यापी रुपमा अमेरिकी नागरिकहरुलाई मास्क लगाउन आदेश नदिने बताएका छन् । अमेरिकाका वरिष्ठ संक्रामक रोग विशेषज्ञ डाक्टर एन्थोनी फौचीले सकेसम्म सर्वसाधारणलाई मास्क लगाउने अनिवार्य व्यवस्था गर्न आग्रह गरेसँगै राष्ट्रपति ट्रम्पको यस्तो प्रतिक्रिया आएको हो ।

अमेरिकामा मास्क लगाउने नलगाउने भन्नेबारे विषयमा राजनीतिकरण भएको छ । अधिकांश राज्य सरकारले घरबाट बाहिर निस्कँदा अनिवार्य रुपमा मास्क लगाउन आदेश दिएक छन् । कोरोना भाइरसको संक्रमण फैलिएयता मास्क नलगाउने बताइरहेका राष्ट्रपति ट्रम्पले गत शनिबार पहिलो पटक मास्क लगाएका थिए । तर शुक्रबार फक्स न्युजसँग कुरा गर्दै राष्ट्रव्यापी रुपमा मास्क अनिवार्य गर्ने कुरामा आफू सहमत नभएको बताएका छन् । मास्क लगाउने नलगाउने भन्नेबारे नागरिकलाई ‘स्वतन्त्र’ छाडिदिनुपर्ने पनि ट्रम्पले बताए ।

डाक्टर फौचीले कोरोना संक्रमण न्यूनीकरणका लागि मास्क लगाउनु अति नै आवश्यक रहेको बताएका थिए । ‘मास्क लगाउनु अति नै आवश्यक छ । हामी सबैले मास्क प्रयोग गर्नुपर्छ,’ डाक्टर फौचीले भनेका थिए ।

कोरोना महामारीबाट सबैभन्दा बढी प्रभावित अमेरिकामा ३६ लाख ४७ हजारभन्दा बढी व्यक्तिमा संक्रमण पुष्टि भएको छ । अमेरिकामा कोरोना भाइरसबाट मृत्यु हुनेको संख्या एक लाख ३९ हजारभन्दा बढी पुगेको छ । त्यस्तै करिब ११ लाख निको भएका छन् ।