काठमाडौं । नेपालमा पछिल्लो केहिदिन यता कोरोना संक्रमणको दर घटेको छ । तर काठमाडौं उपत्यकामा कोरोना संक्रमण हुनेको संख्या केही बढीरहेको स्वास्थ्य तथा जनसंख्या मन्त्रालयको तथ्यांकले पुष्टि गरिदिन्छ ।

उपत्यकामा संक्रमितको संख्या बढ्न थालेपछि सरकारले समुदायमा कोरोना संक्रमण फैलिएको एकिन गर्न परीक्षण सुरु गरेको छ ।

जसको लागि नखुटोल, कोटेश्वर, संखमुल, बुढानिलकण्ठ, कपन, त्रिभुवन अन्तर्राष्ट्रिय विमानस्थल, डिल्लीबजार, कागेश्वरी मनोहरा र टोखाबाट लगायत उपत्यकाका १२ वटा क्षेत्रबाट नमुना परीक्षण भएको इपिडिमियोलोजी तथा रोग नियन्त्रण महाशाखाका प्रमुख डा बासुदेव पाण्डेले बताए ।

अहिलेसम्म संकलन भएका ३ हजार नमुना परीक्षण गर्दा १६ सय जनाको रिपोर्ट आउँदा ३ जनामा मात्रै पोजेटिभ देखिएको छ । उनीहरुको ट्राभल हिस्ट्री नभएको पाइएको उनले बताए ।

असार २५ गतेबाट ४५ हजारको नमुना संकलनको काम अघि बढाइएको पनि उनले बताए । उपत्यकामा मात्रै ५ हजार नमुना संकलन हुनेछन् ।

बैंक तथा वित्तिय संस्था, मालपोत कार्यालय र आइसियु लगायत अग्रपंक्तिमा काम गर्ने व्यक्तिहरुको नमुना संकलन सुरु भएको उनको भनाई छ । अहिलेसम्म संकलन गरी रिपोर्ट आएका ५ सय ५ जनामा नेगेटिभ आएको छ ।