काठमाडौं । अविरल वर्षाका कारण देशका विभिन्न ठाउँमा आएको बाढि तथा पहिरोमा परि हालसम्म १६ जनाको मृत्यु भएको छ भने ५२ जना बेपत्ता भएका छन् । पहिरोमा परि कयौं घाइते समेत भएका छन् ।

बुधबार राती सिन्धुपाल्चोकको भोटेकोसी नदीमा आएको बाढीले बगाउँदा बाह्रबिसे नगरपालिका र भोटेकोसी गाउँपालिकाका २ जनाको मृत्यु भएको छ । भोटेकोसीले ३६ वटा घर बगाएको छ भने घटनामा २० जना बेपत्ता र ७ जना घाइते छन् ।

भोटेकोसीको बाढीले बाह्रबिसे–५ गातीको जम्बु बजारका १४ र खाग्दलका २० वटा घर बगाएको हो । घरसँगै बगेका जम्बुका १६ जना बेपत्ता छन् । ठाडो बल्कुर्टे खोलाले भोटेकोसी–५ बल्कुर्टेका दुईवटा घर बगाउँदा एकै परिवारका चार जना बेपत्ता छन् । जम्बुका २० वर्षीय निकेश बस्नेत र उनकी ३ वर्षीया छोरी निहाना बस्नेतको शव फेला परेको छ ।

त्यसैगरी कास्कीका विभिन्न स्थानमा खसेको पहिरोमा पुरिएर ७ जनाको ज्यान गएको छ । पहिरोले सिद्धार्थ राजमार्गसमेत अवरुद्ध हुन पुगेको छ ।

पोखरा–१८ सराङकोट गोठादीमा बिहीबार राति साढे २ बजेतिर खसेको पहिरोले टंकबहादुर थापाको घर पुर्दा ५ जनाको मृत्यु भएको छ ।

मृत्यु हुनेमा ५० वर्षीय थापा, उनकी श्रीमती ४५ वर्षीया सोममाया, टंकबहादुरका दाजुका नाति ६ वर्षीय सुवान थापा र ११ वर्षकी इसिका थापा छन् । अर्का एक बालकको सनाखत भइनसकेको कास्की प्रहरीले जनाएको छ ।

पहिरोमा टंकबहादुरका छोरीहरू २२ वर्षीया पिंकी र १८ वर्षीया आशा तथा पिंकीकी ५ वर्षीया छोरी पिरिसा घाइते भएका छन् ।

यसैगरी तनहुँको दमौली घर भएकी सोममायाकी २८ वर्षीया बहिनी सरस्वती श्रेष्ठ पनि घाइते छिन् । उनका १० र ८ वर्षका दुई छोरा पनि पहिरोमा परेका छन् । घाइते हुने अन्यमा छिमेकी १९ वर्षीय अनिश तामाङ, रसी थापा, रश्मि थापामगर छन् ।

घाइते सबैको मणिपाल र गण्डकी अस्पतालमा उपचार भइरहेको छ । थापाको घरमा जन्मदिनको पार्टी रहेकाले आफन्त र छिमेकी जम्मा भएका थिए ।

यसैगरी पोखरा–२५ हेम्जामा पहिरोले घर पुर्दा ७० वर्षीया हिमकली अधिकारीको घटनास्थलमै मृत्यु भएको प्रहरीले जनाएको छ । घरसँगै तीन बाख्रा पनि पुरिएका छन् ।

पोखरा–२६ पैतेडाँडामा पनि पहिरोले घर पुर्दा स्थानीय दुर्गाबहादुर सुनारको मृत्यु भएको छ । ब्लकले बनेको दुईकोठे घरसँगै पुरिएका उनका पत्नी, एक छोरा र एक छोरीको उद्धार गरिएको छ ।

त्यस्तै, बिहीबार राति गएको पहिरोमा परी लमजुङमा एकै परिवारका ३ जनाको मृत्यु भएको छ । बेंसीसहर नगरपालिका–१०, खाँचे घर भई हाल बेंसीसहर नगरपालिका ७, सातबिसेको तल्लो क्षेत्रमा बस्दै आएका अन्दाजी ३० वर्षीय दीपक तामाङ, उनकी पत्नी अन्दाजी २५ वर्षीया बिमाया तामाङ र उनीहरुका छोरा अन्दाजी ८ वर्षीय छेवाङ तामाङको पहिरोमा परी मृत्यु भएको हो ।

उनीहरुलाई उद्धार गरी राति नै लमजुङ जिल्ला सामुदायिक अस्पताल पुऱ्याइए पनि चिकित्सकले मृत घोषणा गरेको लमजुङ प्रहरीले जनाएको छ ।

यसैबीच म्याग्दीको धौलागिरिकै ताकममा पहिरोमा परी २ जनाको ज्यान गएको स्थानीय जनप्रतिनिधिबाट खबर प्राप्त भएको जिल्ला प्रहरी कार्यालय म्याग्दीले जनाएको छ । यद्यपी यसकाे पुष्टी हुन बाँकी रहेकाे म्याग्दी प्रहरी प्रमुख डिएसपी किरणजङ् कुँवरले जनाएका छन् ।

पहिरोले ५ घर पुरिएको छ भने विभिन्न ठाउँमा गरी ३२ जना बेपत्ता भएका छन् । धौलागिरि, मालिका र मंगला गाउँपालिमा खसेको पहिरोमा ३२ जना हराइरहेको म्याग्दी प्रहरीले जानकारी दिएको छ ।

म्याग्दी प्रहरी प्रमुख डिएसपी कुँवरका अनुसार धौलागिरीको मराङमा मात्र २२ जना, मालिका गाउँपालिकामा ८ जना र बाँकी मंगला गाउँपालिकामा बेपत्ता भएका हुन् ।

धौलागिरि गाउँपालिका–६ मराङको घन्टीवाङबाट खसेको पहिरोले रिखाका भीमबहादुर जुग्जाली र धनबहादुर जुग्जालीका सहित चार घर बगेका छन् । त्यस्तै मालिका गाउँपालिका–७ बिमको दुलेमा सोमनाथ पौडेलको घर बगेको छ ।

त्यसैगरी पश्चिम रुकुमको आठबिसकोट नगरपालिका–३ को स्यालाखदीमा पहिराले घर पुरिँदा आमा छोराको मृत्यु भएको छ।

स्थानीय तुलबहादुर दमाईको घर पहिरोले पुरिँदा २८ वर्षीया सीता दमाई र उनका ६ वर्षका छोरा हाविल परियारको मृत्यु भएको जिल्ला प्रहरी कार्यालय रुकुम पश्चिमका डीएसपी ठगबहादुर केसीले जानकारी दिए।

पहिरोमा परेर ८ वर्षीया हिरा परियार घाइते भएको उनले बताए।