काठमाडौं । ब्राजिलका राष्ट्रपति जाएर बोलसोनारोमा कोरोना भाइरस (कोभिड–१९) को संक्रमण पुष्टि भएको छ । उच्च ज्वरोलगायतका कोरोना संक्रमणका लक्षण देखिएपछि सोमबार गरिएको चौथो पटकको परीक्षणमा उनमा कोरोना पोजेटिभ पाइएको बीबीसीले जनाएको छ ।

राष्ट्रपति बोलसोनारोले कोरोनालाई सामान्य फ्लु हल्का रुपमा लिँदै आएका थिए । त्यतिमात्र होइन उनले संक्रमण फैलिन नदिन गरिने लकडाउनको पनि विरोध गर्दै आएका छन् । उनले सार्वजनिक स्थानमा जाँदा मास्क पनि लगाउँदैनथे । धेरै स्थानमा उनी विना सामाजिक दुरी र विना मास्कमा देखिएका थिए ।

कोरोना संक्रमण फैलिन नदिन गरिनुपर्ने सावधानीका उपाय नअपनाउँदा अहिले ब्राजिल सबैभन्दा बढी प्रभावित देशको सूचीमा अमेरिकापछि दोस्रो स्थानमा छ ।

हालसम्म ब्राजिलमा १६ लाख ७४ हजार ६ सय ५५ जनामा कोरोना भाइरस संक्रमण पुष्टि भएको छ भने कोरोना संक्रमणबाटै मृत्यु हुनेको संख्या ६६ हजार ८ सय ६८ पुगेको छ ।