जनकपुरधाम । जिउँदै मान्छे जलाएको आरोपमा प्रहरीले थप एक जनालाई पक्राउ गरेको छ ।

राजपुर नगरपालिका–६ का ३४ बर्षीय शेष सरोज भनिने शेष सराजलाई बिहिबार बाराको सिम्रौनगढ नगरपालिकाबाट पक्राउ गरिएको प्रदेश प्रदेश दुईका प्रहरी प्रमुख डीआईजी धिरजप्रताप सिंहले जानकारी दिए ।

पक्राउ परेका सराजले कांग्रेस नेता आफताब आलमको निर्देशनमा आफूले मृत्यु भएका २/३ जना र घाइते भएका १६ जनालाई बोरामा राखी ट्याक्टरमा लिएर इँटा उद्योगको चिम्नीमा लगी जलाएको बयान दिएको सिंहले बताए ।

१३ वर्षअघि रौतहटको इँटा उद्योगमा जिउँदै मान्छे जलाएको घटनाका मुख्य योजनाकार मानिएका कांग्रेस नेता आलम अदालतको आदेशमा हाल पुर्पक्षका लागि थुनामा छन् ।

सोही घटनामा संलग्न रहेको आरोपमा प्रहरीले २४ जेठमा बाराको सिम्रौनगढ नगरपालिका ४ का ५५ बर्षीय मुक्ति शाहलाई पनि पक्राउ गरेको थियो ।