काठमाडौं । पहिलो पटक सशस्त्र प्रहरी बलको गस्ती टोली कालापानीको सीमा नाका १ नम्बर पिलर पुगेको छ ।

गत महिना छाङरुमा स्थापना भएको बोर्डर आउट पोस्ट (बीओपी)बाट इन्सपेक्टर लिली चन्दको एपीएफ टोलीले लिपुलेक नजिकैको १ नम्बर सीमा स्तम्भमा फोर्स मार्च गरेको हो। एक नम्बर पिल्लरबाट लिपुलेक ७ किलोमिटर टाढा छ। जुन अहिले भारतको कब्जामा छ। सो क्षेत्रमा भारतले सडक बनाइरहेको छ।

नेपाल-चीनको एक नम्बर पिल्लर भने तिंकरमा पर्छ। तिंकर वस्तीबाट १० किलोमिटर टाढा छ सीमा स्तम्भ। असार ३ गते छाङरुबाट एपीएफ टोली गस्तीका लागि तिंकर सीमातर्फ गएको थियो।

यता गुञ्जीका स्थानीय बासिन्दाले कालापानी जान भारतीय पक्षले बनाएको अस्थायी काठेपुल भत्काइदिएका छन्। सशस्त्र प्रहरी गस्तीमा आएका बेला स्थानीयले नेपाली भूमिमा बनाएको पुल हटाएका हुन्। गुञ्जी नेपाली गाउँ हो। कालापानीमा कब्जा जमाएको भारतले नेपाली गाउँहरु गुञ्जी, नाभी र कुटीलाई पनि आफ्नो नियन्त्रणमा राखेको छ।