काठमाडौं । नेपालमा कोरोनाका कारण थप २ जनाको ज्यान गएको छ । २ जनामध्ये १ जना भने ५ वर्षीय बालक हुन् ।

उपचारको क्रममा शुक्रबार वीरगन्ज हेल्थ केयर हस्पिटलमा मृत्यु भएका ५ वर्षीय बालकमा कोरोना संक्रमण पुष्टि भएको हो ।

शुक्रबार दिउसो मृत्यु भएका उनको अपरान्ह लिइएको स्वाब परीक्षण गर्दा पीसीआर रिपोर्ट पोजेटिभ आएको हो ।

बाराको निजगढ नगरपालिका–६ योजनाटोल निवासी ती बालकलाई शुक्रबार बिहान ११ बजेतिर वीरगन्ज हेल्थ केयर हस्पिटलमा ल्याइएको थियो ।

निजगढको सामुदायिक अस्पतालबाट ती बालकलाई वीरगन्ज रिफर गरेको थियो ।

बालकमा निमोनिया र ज्वरो देखिएपछि आकस्मिक कक्षमै दुई पटक आरडीटी परीक्षण गरिएको थियो । पहिलो पटक हेल्थ केयर अस्पतालले नै र दोस्रो पटक नारायणी अस्पतालको टोली बोलाएको आरडीटी परीक्षण गरएिको थियो ।

त्यसपछि भने थ्रोट स्वाब संकलन गरिएको थियो । अस्पतालका अनुसार करिब २ बजे स्वास्थ्य अवस्था खराब भएपछि बालकलाई भेन्टिलेटरमा राखिएको थियो। तर, उनको साढे ४ बजे तिर मृत्यु भएको हो ।

त्यसैगरी पर्सामा भेटिएको वेवारिसे शवमा पनि कोरोना संक्रमण पुष्टि भएको छ ।

वीरगञ्जको घण्टाघरमा मृत भेटिएका अन्दाजी २५ वर्षीय पुरुषमा कोरोना संक्रमण पुष्टि भएको हो ।

यसअघि नेपालमा कोरोना संक्रमणबाट १६ जनाको मृत्यु भइसकेको छ ।

मृतकको नाम, थर, ठेगाना नखुलेपछि पोष्टमार्टम गरेर उनको शवपछि नारायणी अस्पतालमै राखिएको छ ।

बेवारिसे शव भए पनि पीसीआर परीक्षणका लागि अस्पतालले स्वाब संकलन गरेको थियो ।

स्वास्थ्य तथा जनसंख्ष्या मन्त्रालयका प्रवक्ता डा. जागेश्वर गौतमले आजको नियमित मिडिया व्रिफिङका क्रममा पछिल्लो २४ घण्टामा कोरोनाका कारण थप दुई जनाको मृत्यु भएको र मृतकको संख्या १८ पुगेको जानकारी गराएका हुन् ।