सुर्खेत । कर्णाली प्रदेशमा थप १ सय ६ जनामा कोरोना पुष्टि भएको छ । स्वास्थ्य विज्ञान प्रतिष्ठान शिक्षण अस्पताल जुम्लामा गरिएको पछिल्लो कोरोना परीक्षणमा थप १०६ जनामा पोजेटिभ देखिएको हो ।

प्रतिष्ठानको प्रयोगशाला विभागले प्रकाशन गरेको पछिल्लो तथ्यांकअनुसार दैलेखमा १०५ जनामा तथा मुगुमा एक जनामा कोरोना पोजेटिभ देखिएको हो ।

आज पोजेटिभ देखिनेहरूमा दैलेख नारायण नगरपालिकाका मात्रै ६९ जना रहेका छन् । जसमध्ये ५ जना महिला महिला रहेका छन् । त्यसैगरी देवलकाँडाका १२ जना, सोतका ९ जना, मानटाकुराका ७ जना, साडुका २ जना, भगनीका ५ जना, बासकोटका १ जना कोरोना संक्रमित रहेको कर्णाली स्वास्थ्यविज्ञान प्रतिष्ठानले बताएको छ । त्यस्तै मुगु खत्याडका १ जना पुरुषमा पोजेटिभ नतिजा देखिएको हो ।

यसअघि विभिन्न समयमा कर्णाली प्रतिष्ठानबाटै परीक्षण गरिएका दैलेख, कालिकोट, जुम्ला सहितका जिल्लाका १०७ जनाको रिपोर्ट पोजेटिभ आएको थियो । यसैगरी आज एकाएक १०६ जनाको पोजेटिभ भएपछि कर्णालीमा कोरोना संक्रमितको संख्या २१३ पुगेको छ ।

त्यसैगरी एकै दिन धेरै जनामा कोरोना पोजेटिभ देखिएपछि कर्णालीमा त्रास बढेको छ ।