काठमाडौं । नेपालकाे नयाँ राजनीतिक नक्सा सार्वजनिक भएपछि सरकारले संसदमा पेस गर्ने तयारी गरिएको संविधान संशोधन विधेयकमा राष्ट्रिय प्रजातन्त्र पार्टी (राप्रपा) ले समर्थन गर्ने निर्णय गरेको छ ।

विधेयकको पक्षमा मतदान गर्ने निर्णय पार्टीले गरेको सो पार्टीका केन्द्रीय सचिवालय प्रमुख ध्रुवबहादुर प्रधानले जानकारी दिए । राप्रपाका अध्यक्षत्रय कमल थापा, पशुपति शमशेर राणा र प्रकाशचन्द्र लोहनीबीचको बैठकले संविधान संशोधनमा समर्थन गर्ने निर्णय गरेको हो ।

लिम्पियाधुरा, कालापानी र लिपुलेकलगायतका भूभाग समेटिएको नेपालको अध्यावधिक नक्सा अनुसूची ३ मा उल्लेख गरिएको निशान छापमा राख्नुपर्ने भएपछि सरकारले संविधान संशोधनको तयारी गरेको छ । बुधबारको संसद्को सम्भावित कार्यसूचीमा संविधान संशोधन विधेयक पेस गर्ने उल्लेख भए पनि सूचीबाट भने हटेको छ ।

थ्रेस होल्डका कारण गत प्रतिनिधिसभाको निर्वाचनमा राप्रपाले दलको मान्यता पाउन सकेन । तर सो पार्टीबाट विजयी सांसद् राजेन्द्र लिङ्देन स्वतन्त्र सांसद्को भूमिकामा छन् ।