धनकुटा । धनुकटामा एक बलात्कत महिलाकाे सुरक्षामा खटिएका ३४ वर्षीय प्रहरीका जवानलाई काेराेना संक्रमण  पुष्टि भएकाे छ ।

स्वास्थ्य मन्त्रालयका सह–प्रवक्ता समिरकुमार अधिकारीले बिहीबार बिहान ६ः५० बजे धनुकटाका एक जना व्यक्तिमा संक्रमण पाइएको पुष्टि गरेका थिए ।

जिल्ला प्रशासन कार्यालय, धनकुटाका अधिकृत जयराम श्रेष्ठले संक्रमित प्रहरीलाई कोभिड अस्पताल विराटनगर पठाइसकिएको बताए । उनका अनुसार, संक्रमित प्रहरी अस्पतालमा उपचाररत एक जना बलात्कृत बालिकाको सुरक्षामा खटिएका थिए । पीडितको पनि कोरोना भाइरस जाँच्न पीसीआर परीक्षण गरिसकिएको छ । यद्यपि, रिपोर्ट आइसकेको छैन ।

जिल्ला अस्पताल, धनकुटामा कार्यरत रहेका बेला उनलाई संक्रमण सरेको हुनसक्ने आशंका गरिएको छ । उनीसँगै खटिएका अर्का एक जना प्रहरीलाई पनि संक्रमण पुष्टि भइसकेको छ । हालसम्म धनकुटामा ७ जनामा कोरोना संक्रमण देखिएको छ ।