काठमाडौं। सत्तारुढ नेपाल कम्युनिस्ट पार्टी (नेकपा) को विद्यार्थी संगठन सिमानामा काँडेतार लगाएर घेराबार गर्न सरकारसँग माग गरेको छ । आइतबार राष्ट्रिय युवा संघ नेपाल र अनेरास्ववियूले सरकारसँग यस्ताे माग गरेको हाे।

परराष्ट्रमन्त्री प्रदीपकुमार ज्ञवालीलाई ज्ञापनपत्र बुझाउँदै दुवै संगठनले सिमाना रक्षा गर्न सुरक्षा फौज राख्न र काडेतार लगाई घेराबार गर्न आग्रह गरे। नेकपाको युवा र विद्यार्थी संगठनले तत्काल कुटनीतिक तवरले मिचिएका भूमि फिर्ता गर्न गराउन विशेष पहल गर्न माग समेत गरेको छ ।

ज्ञापनपत्र बुझ्दै परराष्ट्रमन्त्री प्रदीपकुमार ज्ञवालीले सीमा समस्या समाधान गर्न सरकारले कुटनीतिक पहल गरिरहेको बताए।राष्ट्रिय युवा संघ नेपाल र अनेरास्ववियूले गत मंसिरमा भारतले नेपाली भूमिसमेत समेटेर सार्वजनिक गरेको नक्सा खारेजी र वैशाख २६ गते भारतले नेपाली भूमि अतिक्रमण गरी बनाएको सडक सञ्चालन रोक्न पनि तत्काल कुटनीतिक पहल चाल्न सरकारको ध्यानाकर्षण गराएको थियाे ।