काठमाडौं । नोवेल कोरोना भाइरस (कोभिड–१९) बाट भारतमा पछिल्लो २४ घन्टामा मृत्यु हुनेको संख्या १०० नाघेको छ ।

पछिल्ला दिनमा भारतमा दिनप्रतिदिन संक्रमित र मृतकको संख्या बढीरहेको छ भने नेपालमा पनि संक्रमितको संख्या बढिरहेको छ । आजै मात्र नेपालमा १६ जना संक्रमित थपिएका हुन् । जसमध्ये १५ जना नेपालगञ्ज र १ जना वीरगञ्जका रहेका छन् ।

यो सँगै नेपालमा कोरोना संक्रमितको संख्या ७५ पुगेको छ भने १६ जना निको भएर घर फर्केका छन् । आजको तथ्यांकले भारत र नेपालमा कोरोनाको अब भने महामारीको रुप लिने अनुमान लगाउन सकिन्छ ।

हालसम्म ३९ हजार ६ सय ९९ जना संक्रमित देखिएको भारतमा १ हजार ३ सय २३ जनाले ज्यान गुमाइसकेका छन् भने पछिल्लो २४ घन्टामा मात्र एक सय जनाको ज्यान गएको वल्र्डोमिटरको तथ्यांकमा उल्लेख गरिएको छ ।

हालसम्म विश्वभर संक्रमितको संख्या ३४ लाख ८१ हजार १ सय ६२ पुगेका छन् भने हालसम्म मृतकको संख्या २ लाख ४४ हजार ६ सय ६० पुगेको छ ।

जसमध्ये सबैभन्दा धेरै अमेरिकामा पुगेको छ । अमेरिकामा ११ लाख ६० हजार ५ सय ८५ जना संक्रमित छन् भने ६७ हजार ४ सय ४१ जनाले ज्यान गुमाइसकेका छन् । अमेरिकामा पछिल्लो २४ घन्टामा १ हजार ६ सय ८८ ले ज्यान गुमाएका छन् ।