काठमाडौं । लफडाउनका कारण नेपालमै रोकिएका आफ्ना नागरिकलाई रसियाले स्वदेश लगेको छ ।

आज दिउँसो चार्टर्ड उडानबाट १ सय १० जना रुसी नागरिक बोकेर रुसको वायुसेवा कम्पनी मस्को उडेको हो ।

नेपालस्थित रसिया दूतावासको पहलमा चार्टर्ड उडान भएको हो ।

रुसबाट रोयल फ्लाइट एयरलाइन्सको जहाज काठमाडौं आएको थियो । साढे १० बजे काठमाडौं अवतरण गरेको जहाज काठमाडौंबाट १२ः४० मा मस्कोका लागि उडेको हो ।

दूताबासले १ सय ४३ यात्रु लैजाने भने पनि १ सय १० जना मात्र उडेका छन् । त्रिभुवन अन्तर्राष्ट्रिय विमानस्थल कार्यालयले १ सय १० यात्रु लिएर रसियाको उक्त विमान प्रस्थान गरेको जानकारी दियो ।

दूतावासले आफ्ना १ सय ४३ नागरिक लैजान विमान चार्टर्ड गर्न नागरिक उड्डयन प्राधिकरणसँग अनुमति मागेको थियो । तर, के कारणले १ सय १० जना मात्र उडे त्यो भने खुलाइएको छैन ।

लकडाउनयता नेपालबाट ४ हजारभन्दा बढी विदेशी चार्टर्ड उडानबाट आफ्नो मुलुक फिर्ता भइसकेका छन् ।