काठमाडौं । अमेरिकाको न्युयोर्क सहरमा रहेको ब्रोन्क्स चिडियाघरमा रहेको चार वर्षको पोथी बाघलाई कोरोना भाइरस संक्रमण भएको पुष्टि भएको छ ।

ब्रोन्क्स चिडियाघरले आयोवास्थित नेशनल भेटिनरी सर्भिसमा गरिएको परीक्षणका क्रममा त्यहाँ रहेको चार वर्षको सो बाघमा कोरोना भाइरस पोजिटिभ देखिएको हो ।

नादिया नाम गरेको यो पोथी बाघकी बहिनी अजुल र दुई अन्य बाट र तीन अफ्रिकी सिंहमा सुक्खा खोकी देखिएको थियो । ब्रोन्क्स चिडियाघरका कर्मचारीबाट पोथी बाघमा कोरोना संक्रमण भएको अनुमान गरिएको छ ।

लक्षण देखिएका कुनै कर्मचारी सो स्थानमा पुग्दा बाघमा समेत कोरोना भाइरस संक्रमण भएको हुनसक्ने चिडियाघरले जनाएको छ । चिडियाघरबाट जारी वक्तव्यमा धेरै सावधानीपूर्वक नादियाको परीक्षण गरिएको उल्लेख छ ।

नादिया र सुक्खा खोकी देखिएका अन्य जनावरको खानामा कमी आएको थियो । तर चिडियाघर व्यवस्थापनले उनीहरुको पर्याप्त हेरचाह भइरहेको जनाएको बीबीसीले लेखेको छ ।

यी जनावरलाई चिडियाघरमा अलग रुपमा बनाइएको पर्वतीय इलाकामा अलग–अलग राखिएको छ । कोरोना भाइरसले जनावरमा पार्ने असरबारे कुनै जानकारी उपलब्ध छैन । तर निगरानी जारी राखिएको छ ।

यो चिडियाघरमा चार वटा अन्य बाघ, हिउँचितुवा, चितुवामा भने कोरोनाको लक्षण देखिएको छैन । चिडिया घरबाट जारी वक्तव्यमा अहिलेसम्म पनि मान्छेबाट जनावरमा कोरोना संक्रमण फैलिएको पत्ता लागिसकेको छैन ।

ब्रोन्क्स चिडियाघर पनि आम मानिसका लागि १६ मार्चदेखि बन्द छ । तर कोरोना भाइरस संक्रमणबाट अन्य जनावरलाई सुरक्षित राख्ने उपायको खोजी भइरहेको छ ।