काठमाडौं । त्रिभुवन अन्तर्राष्ट्रिय विमानस्थलबाट हुने अवैध तस्करी दिन प्रतिदिन बढिरहेको छ । प्रायः दैनिक जसो भारतीय नागरिकहरु अवैध सुनसहित पक्राउ परिरहेका छन् ।

आज पनि एयरपोर्टमा अवैध हिरा र सुनसहित दुई जना भारतीय नागरिक पक्राउ परे । मलेसियाबाट आएका भारतीय नागरिक महोम्मद माहिन साथलि र सारजाबाट आएका कोट्ककुथ नौसाद पक्राउ परेका हुन् ।

भन्सार एरिया पास गरेर बाहिरिएका साथलिमाथि काठमाडौं मेडिकल कलेज पुर्याएर चेकजाँच गर्दा उनको पेटमा २०० ग्राम हिरा भेटिएको महानगरिय प्रहरी परिसरका प्रमुख एसएसपी सहकुलबहादुर थापाले बताए ।

विशेष सूचनाको आधारमा महाशाखा र विमानस्थलको प्रहरी टोलीले संयुक्त रुपमा साथलीमाथि अनुसन्धान गरेको थियो ।

त्यस्तै सारजाबाट आएका नौसादको साथबाट ५०० ग्राम सुन बरामद भएको एसएसपी थापाले बताए ।

यसअघि विहिबार भारतीय नागरिकहरु नविन गोपी चन्द र भरत सुरेशलाल २ किलो सुन सहित पक्राउ परेका थिए । त्यस्तै १५ गते मंगलबार पनि आधा किलो सुनसहित भारतीय नागरिक हरिराम नेपाली पक्राउ परेका थिए ।

उनीहरु तीनै जनाले मलद्धारमा सुन लुकाएर ल्याएका थिए ।